Axad, April 6, 2025 (HOL) - Raysal Wasaaraha Xukumadda Federaalka Soomaaliya Xamse Cabdi Barre ayaa maanta xilka u kala wareejiyay Wasiirka cusub ee Wasaaradda Gaashaandhigga Soomaaliya Jabriil Cabdirashiid Xaaji Cabdi iyo Wasiirkii hore ee Wasaaradda Cabdiqaadir Maxamed Nuur.
Raysal wasaare Xamse Cabdi oo ka hadlaayay munaasabada xil wareejinta ayaa sheegay in Wasaaradda Gaashaandhigga ay laf dhabar u tahay difaaca Qaranka, amniga iyo horumarinta siyaasadda Qaran ee dib u habeynta iyo tayeynta ciidanka Qaranka Soomaaliyeed.
"Wasaaradda Gaashaandhiggu waxay ku tallaabsatay horumar dhinacyo badan leh oo ay kamid yihiin qaadista cunaqabateyntii hubka oo muddo dheer kaddib dalkeenna laga qaaday, diyaarintii ciidamadii kala duwanaa ee ka qeyb-qaatay amniga caasimadda, iyo diyaarinta qorshaha casriyeynta hannaanka ciidamada Xoogga dalka Soomaaliyeed oo lagu sameeyay dib-u-habeyn xooggan, sidaas awgeed Wasiirka cusub waxaa laga doonayaa in uu horumariyo siyaasadda Qaran ee difaaca iyo dib-u xoreynta dalka" ayuu yiri Raysal Wasaare Xamsa Cabdi Barre.
Xamse Cabdi Barre ayaa sidoo kale ku amaanay Wasiirkii hore ee Gaashaandhigga dadaalkii uu galiyey sidii loo heli lahaa ciidan Qaran oo awood u leh iney dalka ka difaacaan cadowga, islamarkaana u diyaarsan ciribtirka Al-shabaab.
Raysal wasaaraha ayaa Wasiirka cusub ee Wasaradda Jabriil Cabdirashiid kula dardaarmay inuu dardargaliyo dib u habeynta ciidamada iyo wada shaqaynta hay’addaha amniga, si looga guuleysto kooxaha loogu yeero argagixisada oo ay dowladda dagaalka kula jirto.
Wasiirkii hore ee Wasaaradda Gaashaandhigga Cabdulqaadir Maxamed Nuur iyo Wasiirka cusub ee Wasaaradda Jibriil Cabdirashiid Xaaji Cabdi ayaa munaasabada ka kala jeediyay khudbado kala duwan oo la xariiray horumarka Wasaaradda ay ku talaabsatay iyo waliba sidii loo soo afjari lahaa kooxda Al-shabaab.
Ugu dambeyntii Xil wareejintaan ayaa imaaneysa, kadib markii 17-kii bishii Maarso xilka laga qaaday Wasiirkii Wasaaraddaan Gaashaandhiga soo maamulaayay dhowrkii sano ee u dambeysay Cabdulqaadir Maxamed Nuur.