Axad, Agoosto 3, 2025 (HOL) - Qaramada Midoobay ayaa daaha ka qaaday xaalado walaac leh oo ka socda Geeska Afrika, kaddib markii warbixinnada cunaqabateynta cusub ay muujinayaan in uu kordhayo xiriirka ka dhexeeya fallaagada Xuutiyiinta Yemen iyo kooxda Al‑Shabaab ee ka dagaalanta Soomaaliya.
Sida lagu sheegay warbixin uu dhawaan qoray The Washington Post, xoogagga Xuutiyiinta ayaa la sheegay inay u direen khubaro miinooyin iyo walxaha qarxa ku takhasusay magaalada Jilib, oo ah xarun weyn oo Al‑Shabaab u tahay koonfurta Soomaaliya.
Kashifaaddan ayaa muujinaysa khatar amni oo sii kordheysa oo ku baahsan Badda Cadmeed, taasoo tilmaamaysa iskaashi hawlgal oo sii xoogeysanaya oo ka dhexeeya labada koox ee Maraykanku u aqoonsan yahay kooxo argagixiso.
Jilib, oo ku taalla gobolka Jubbada Dhexe ee hoos taga Dowlad-Goboleedka Jubbaland, ayaa muddo dheer u ahayd xarunta maamulka iyo qorsheynta dagaallada Al‑Shabaab.
Khabiirada amniga ayaa ka digaya in iskaashigan cusub uu sababi karo in labada koox ay is dhaafsadaan xeelado halis ah iyo tiknoolojiyad, taasoo sare u qaadi karta awooddooda dagaal.
Sarkaal hore oo sare oo ka tirsanaa Wasaaradda Arrimaha Dibadda Mareykanka ayaa u sheegay The Washington Post in hoos u dhaca joogitaanka Mareykanka ee Soomaaliya uu abuurayo meel madhan oo ay ka faa’iideysan karaan Al‑Shabaab iyo Xuutiyiintu.
Sarkaalku wuxuu carrabka ku adkeeyay khatarta ah in Al‑Shabaab ay ballaariso saameynteeda dalalka deriska ah sida Kenya iyo Itoobiya, iyadoo sidoo kalena sii xoojinaysa xiriirkeeda istiraatiijiyadeed ee ay la leedahay Xuutiyiinta.
Diblomaasiyiin iyo saraakiil ciidan oo Maraykan ah ayaa sidoo kale ka digaya xaaladda. Ilo kala duwan ayaa sheegay in haddii Mareykanku sii yareeyo joogitaankiisa Soomaaliya, ay taasi si daran u wiiqi karto dadaallada muddada dheer lagu xasillinayo siyaasadda nugul ee dalka.
Si kastaba ha ahaatee, iyadoo xiriirka cusub ee ka dhexeeya Xuutiyiinta iyo Al‑Shabaab uu sii ban-baxayo, khubarada amnigu waxay ugu baaqayaan beesha caalamka inay si degdeg ah uga wada shaqeeyaan xal u helidda khatartan isa-soo taraysa, kahor inta aysan sii wiiqin mid ka mid ah gobollada ugu nugul ee caalamka.