Jimco, Juun 6, 2025 (HOL) - Madaxweynaha Maraykanka, Donald Trump, iyo maalqabeenka Elon Musk oo muddo dheer saaxiib siyaasadeed ahaa, ayaa dagaal adag ka dhex qarxay. Dagaalkooda ayaa salka ku haya khilaaf siyaasadeed iyo mid shaqsiyeed oo si xawli ah u sii kordhaya, taasoo burburisay xidhiidhkoodii hore.
Elon Musk wuxuu ahaa taageere weyn oo Trump ah intii lagu jiray ololaha doorashada 2024, isagoo ku deeqay in ka badan $250 milyan, kadib markii uu Trump guulaystayna waxa loo magacaabay agaasimaha Waaxda Waxtarka Dowladda (DOGE) oo uu Trump aasaasay si loo yareeyo kharashaadka dowladda.
Si kastaba ha ahaatee, xidhiidhkooda ayaa xumaaday kadib markii Musk si adag u dhaleeceeyay sharciga cusub ee Trump ee lagu magacaabo "One Big Beautiful Bill", kaasoo uu ku eedeeyay inuu kordhinayo deynta qaranka illaa $2.5 tirilyan, isla markaana uu yareynayo taageerada tamarta nadiifka ah, gaar ahaan cashuur-dhimista gawaadhida korontada ku shaqeeya.
Trump ayaa si cad uga jawaabay dhaleeceynta Musk, isagoo sheegay inuu ka niyad jabay, isla markaana waxa uu ku eedeeyay Musk inuu adeegsanayo saaxiibtinimada siyaasadeed si uu ugu faa’iideeyo ganacsigiisa. Wuxuu sidoo kale ku hanjabay inuu joojin doono qandaraasyada dowladda ee la xidhiidha shirkadaha Musk sida SpaceX iyo Starlink.
“Waxba kama qabo haddii uu Elon Musk iga soo horjeedsado, laakiin waxay ahayd inuu sidaas sameeyo bilo kahor,” ayuu yidhi Trump, isagoo ula jeeda in Musk uu kasoo horjeestay kadib markii laga qaaday xilka Waaxda Waxtarka Dowladda oo uu madax ka ahaa.
Musk ayaa isna uga jawaabay si kulul, isagoo sheegay in Trump uusan noqon lahayn madaxweyne taageeradiisa la'aanteed, wuxuuna soo jeediyay in Trump laga xayuubiyo xilka. Sidoo kale, Musk ayaa ku eedeeyay Trump inuu xidhiidh la lahaa musuqmaasuq iyo dilka nin lagu magacaabi jiray Epstein.
“Waa wakhtigii bamka weyn la tuuri lahaa. Trump wuxuu ku jiraa faylasha Epstein, taasina waa sababta loo shaacin waayay,” ayuu Musk ku baahiyay bartiisa X.
Khilaafka ayaa saameyn weyn ku yeeshay suuqyada, iyadoo saamiyada Tesla ay hoos u dhaceen 14%, taasoo u dhiganta qiyaastii $150 bilyan oo doolar oo lumay. Sidoo kale, khilaafkan ayaa dhaawacay sumcadda Tesla ee suuqyada caalamka sida Shiinaha iyo Yurub.
Dhinaca siyaasadda, khilaafka ayaa muujiyay kala qeybsanaanta ka dhex jirta xisbiga Jamhuuriga iyo taageerayaasha tiknoolajiyadda ee garabka midig, iyadoo Musk xitaa soo jeediyay in la sameeyo xisbi cusub si looga hortago Trump.
Dagaalka u dhexeeya Musk iyo Trump wuxuu muujinayaa sida ay siyaasadda iyo ganacsigu isugu dhex milmeen gudaha Maraykanka. Khilaafkooda wuxuu leeyahay saameyn ballaadhan oo siyaasaddeed, dhaqaale, iyo dhaawac soo gaadha mustaqbalka shirkadaha ay madaxda ka yihiin.