Jimco, Juun 6, 2025 (HOL) - Warsaxafadeed kasoo baxay Wasaaradda Warfaafinta Xukuumadda Federaalka Soomaaliya ayaa faahfaahin dheeraad ah looga bixiyay wadahadalada uu ku baaqay madaxweyne Xasan Sheekh Maxamuud ee ku aadan xaaladaha siyaasadeed ee dalka.
Madaxweynaha dowladda Federaalka Soomaaliya ayaa markale ku celiyay inuu diyaar u yahay inuu wadahadalo la yeesho hoggaamiyaasha kala duwan ee heer qaran si xal waara loogu helo cabashada ay qabaan hoggaamiyaasha qaarkood.
"Madaxweynaha ayaa gudagalay wadahadallo la xiriira arrimaha dalka oo uu la yeeshay hoggaamiyeyaasha kala duwan ee heer Qaran. Ujeedada hindisahan waa in si dhab ah loo dhageysto cabashooyinka iyo aragtiyada hoggaamiyeyaashaasi, si looga wada shaqeeyo arrimaha masiiriga ah ee mudnaanta u leh dalka, oo ay ka mid yihiin dagaalka lagula jiro Khawaarijta Al-Shabaab, dhammeystirka dib-u-eegista dastuurka, iyo diyaarinta doorashooyinka deegaanka iyo kuwa heer qaran" ayaa lagu yiri Warsaxafadeedka kasoo baxay Wasaaradda Warfaafinta Soomaaliya.
Maalin ka hor ayuu madaxweynaha kulan kula qaatay xarunta madaxtooyada dalka qaar ka mid ah madaxda Ururada Siyaasada ee la diiwaangeliyey, xubno ka tirsan bulshada rayidka ah, iyo siyaasiyiin xilal muhiim ah kasoo qabtay dalka, isagoo muujinaya sida ay uga go'an tahay dhageysiga aragtida qeybaha kala duwan ee bulshada.
"Iyadoo uu wadatashigu sii socdo, Madaxweynaha ayaa si rasmi ah casuumaad ugu fidiyey madax ay ka mid yihiin: madaxweynayaal hore, ra’iisul wasaareyaal hore, ku-xigeennadooda, guddoomiyeyaasha iyo ku-xigeennada hore ee baarlamaanka, iyo madaxda dowlad-goboleedyadii hore. Waxaa la filayaa in kulankan sare uu qabsoomo 15-ka Juun 2025, si waayo-aragnimadooda iyo taladooda looga faa’iidaysto" ayaa lagu yiri Warsaxafadeedka kasoo baxay Wasaaradda Warfaafinta Soomaaliya.
Gogasha uu iclaamiyay madaxweyne Xasan Sheekh 15-ka bishaan June ee uu kula kulmi doono xubnaha mucaaradka ku ah dowladdiisa, waxaa xiga doono kulan kale oo uu Madaxweynaha isugu yeeri doona Golaha Wadatashiga Qaran oo ka kooban madaxda dowladda Federaalka iyo dowlad goboleedyada, kaas oo qabsoomi doona 22-ka bishan Juun, kaasoo lagu gorfeyn doono talooyinka kaso baxa wadatashiyada gogosha shirka 15-ka Juun.
Hoos ka akhriso Warsaxafadeedka oo dhameystiran:- 