Axad, May 25, 2025 (HOL) - Shir ballaaran oo u dhexeeya ururrada siyaasadda ee
diiwaangishan iyo Xukuumadda Federaalka ayaa si rasmi ah ufurmay,
Waxaana Kasoo qeyb galay Madax sare oo ka socoto Hay'adaha kala duwan ee
Dowladda oo uu ugu horreeyo Wasiirka Wasaaradda Cadaaladda, wasiiru
dowlaha Xafiiska Ra’iisul wasaaraha, wasiir dowlaha wasaaradda Arrimaha
Dibadda, shirkaan ayaa waxaa soo qabanqaabiyay Guddiga qabanqaabada
Gogosha Qaran, ee uu Guddoomiye u yahay Wasiirka Wasaaradda Cadaaladda
iyo Arrimaha Dastuurka, Xassan Macallin Maxamuud.
Shirkan ayaa
diiradda lagu saarayaa arrimaha Amniga, Dastuurka iyo Doorashooyinka,
waxaana uu gogol xaar u yahay shir weynaha uu Madaxweynaha JFS Dr Xasan
Sheikh Maxamuud ku baaqay si loo helo isfaham siyaasadeed oo qaran.
Wasiirka
Wasaaradda Cadaaladda iyo Arrimaha Dastuurka ee Xukuumadda JFS, Xasan
Macallin Maxamuud oo maanta furay kullanka wadatashiga u dhexeeya
Xukuumadda iyo ururrada siyaasadeed kaas oo looga hadlayo arrimaha
masiiriga ah ee dalka ayaa sheegay in muddo dheer dalka ka maqnaa
nidaamka ururrada siyaasadeed, balse Xukuumadda DanQaran ay si dhab ah
ugu hawlan tahay dib u soo celinta nidaamkaas, iyadoo tallaabada ugu
horreysa ay ahayd dib u eegista Dastuurka.
"Muddo dheer dalka
waxa ka maqnaa nidaamka ururrada siyaasadeed. Xukuumadda DanQaran ee
hadda jirta waxay si daacad ah ugu hawlan tahay sidii dib loogu soo
celin lahaa nidaamkaas ku saleysan ururrada siyaasadeed, iyadoo
tallaabadii ugu horreysay ahayd dib u eegista Dastuurka dalka. Maanta
waxaan kusoo laabannay waddadii saxda ahayd oo muddo dheer aan ka
maqneen.” ayuu yiri Wasiir Xasan Macallin Maxamuud.
Wasiiru
Dowlaha Wasaaradda Arrimaha Dibadda iyo Iskaashiga Caalamiga ah, Cali
Cumar Cali (Cali Balcad) oo ka hadlay Kullanka latashiga ururada
siyaasadda dalka iyo Xukuumadda Federaalka, ayaa tilmaamay in Soomaaliya
ay marayso marxalad cusub oo lagu dhisayo nidaam doorasho dimuqraadi
ah, shirkaanna gogol xaar u yahay wada-tashi Qaran oo lagu xaqiijinayo
in shacabka Soomaaliyeed ay si toos ah u doortaan ciddii mataleysa,
asaga oo intaas ku daray in Madaxdii hore ee dalka soo xukuntay qeyb ka
yihiin gogosha uu Madaxweynuhu iclaamiyay.
Wasiir dowlaha
Xafiiska Ra’iisul wasaaraha Xirsi Jaamac Gaani ayaa ka dhawaajiy in
dalka uu u jiheystay ururada xisbiyada, waxaana cadeeyay in wadooyinkii
lagu soo hoogay in aan soo xirno waa in umadda dhan dheerigaliyo
tahay, waana wadada kali ah ee looga bixi karo isjiid jiidka mudda dheer
jiray.
Kamaal Guutale, Xoghayaha Joogtada ee Xafiiska Ra’iisul
Wasaaraha, ayaa sheegay in doorasho qof iyo cod ah ay tahay tiir muhiim u
ah dowlad-dhiska, islamarkaana loo baahan yahay wada-tashi iyo midnimo
qaran.
Prof. Cabdullahi Xirsi Diirshe (Daacad) oo ku hadlay Afka
Ururrada Xisbiyada Siyaasadeed, ayaa si diirran u soo dhaweeyay
kullanka wadashiga ee Xukuumadda Federaalka iyo ururrada siyaasadda,
isaga oo sheegay in ay taageersanyihiin gogosha qaran ee uu Madaxweynaha
ku baaqay, kuna tilmaamay tallaabo masiiri ah oo xoojinaysa midnimada
iyo wada-tashiga siyaasadeed.